Teri Shabih Ko Likkha Hai Rang-o-bu Maine
teri shabih ko likkha hai rang-o-bu main ne
gulon ki aise bacha li hai aabru main ne
kitab-e-zist pe hai lafz-e-na-shanasai
magar ye kya ki likha tum ko aaj tu main ne
mujhi mein rah ke wo ab tak nahin mila mujh ko
ki ek umr se ki jis ki justuju main ne
rahenge chain se ab dard main mohabbat gham
tumhaari dil se miTa di hai aarzu main ne
jo mere lahje mein ab bhi KHumar hai 'sadiq'
kisi se KHwab mein kar li thi guftugu main ne
Ehtimam Sadiq 
(3359) Peoples Rate This