Muntashir Har Shai Qarine Se Saja Di Jaegi
muntashir har shai qarine se saja di jaegi
ya mere kamre ki shaKHsiyyat miTa di jaegi
sath rakhiye kaam aaega bahut nam-e-KHuda
KHauf gar jaga to phir kis ko sada di jaegi
aag bhaDkegi hawa pa kar baDa sach ye nahin
sach baDa ye hai ki shoalon ko hawa di jaegi
be-Thikana yun kiya jaega ek jalta charagh
taqche mein mom ki guDiya biTha di jaegi
aaina haalat ka aaega jo bhi dekhne
koi umda si ghazal us ko suna di jaegi
bolne par koi pabandi nahin kuchh boliye
han magar aawaz uTThegi daba di jaegi
sar-ba-kaf ho jaenge pir-o-jawan sab dekhna
desh ki KHatir mata-e-jaan luTa di jaegi
ghair-mumkin kuchh nahin duniya mein lekin 'ehtiram'
aap ki sohbat bhala kaise bhula di jaegi
Ehteram Islam 
(822) Peoples Rate This