Yaad Teri Jo Kabhi Aati Hai Bahlane Ko
yaad teri jo kabhi aati hai bahlane ko
aur diwana bana jati hai diwane ko
hum bataenge tumhein shana-o-gesu ke rumuz
KHatm kar lo haram-o-dair ke afsane ko
us ko mahfil mein jo dekha tapish-e-gham ka sharik
le liya shama ne aaghosh mein parwane ko
baada-kash waiz-e-kaj-fahm se kya bahs karen
us ne dekha hai bahut dur se maiKHane ko
jab na ehsan rahega na kahani us ki
aap dohraenge 'ehsan' ke afsane ko
Ehsan Darbhangavi 
(833) Peoples Rate This