Ishq Ko Taqlid Se Aazad Kar
ishq ko taqlid se aazad kar
dil se girya aankh se fariyaad kar
baz aa ai banda-e-husn-e-majaz
yun na apni zindagi barbaad kar
ai KHayalon ke makin nazron se dur
meri viran KHalwaten aabaad kar
naza mein hichki nahin aai mujhe
bhulne wale KHuda-ra yaad kar
husn ko duniya ki aankhon se na dekh
apni ek tarz-e-nazar ijad kar
ishrat-e-duniya hai ek KHwab-e-bahaar
kaba-e-dil dard se aabaad kar
ab kahan 'ehsan' duniya mein wafa
tauba kar nadan KHuda ko yaad kar
Ehsan Danish 
(1047) Peoples Rate This