MiTTi Tha Aur Dudh Mein Gundha Gaya Mujhe
miTTi tha aur dudh mein gundha gaya mujhe
ek chand ke wajud mein gundha gaya mujhe
main nist aur nabud ki ek kaifiyat mein tha
jab wahm-e-hast-o-bud mein gundha gaya mujhe
main chashm-e-kam-rasa se jise dekhta na tha
us KHwab-e-la-hudud mein gundha gaya mujhe
KHas-KHana-e-ziyan ki shararbariyon ke baad
yaKH-zar-e-nar-e-sud mein gundha gaya mujhe
ek dast-e-ghaib ne mujhe la chaak par dhara
phir waqt ke jumud mein gundha gaya mujhe
is mein to aasman ke shajar bhi samar na den
jis KHak-e-be-numud mein gundha gaya mujhe
qaus-e-quzah ki samt bahut dekhta tha main
aaKHir ghubar-o-dud mein gundha gaya mujhe
Daniyal Tareer 
(1179) Peoples Rate This