Tanhai Mein Aaj Un Se Mulaqat Hui Hai
tanhai mein aaj un se mulaqat hui hai
jis baat ki KHwahish thi wahi baat hui hai
aankhon se gire ashk TapaTap to wo bole
baadal ke baghair aaj ye barsat hui hai
samjha hun usi din hi se main zist ka mafhum
jis din se meri tum se mulaqat hui hai
KHwabon mein mulaqaten to hoti rahin aksar
ba-nafs-e-nafis aaj mulaqat hui hai
maqsad tha mile gham se najat is liye ai 'charKH'
ek umr meri waqf-e-KHirajat hui hai
Charkh Chinioti 
(1450) Peoples Rate This