Chaukidar
ek soft-drink ki qimat mein
december ki sardi mein
jab hamein apne bistar se
darwaze tak jaana
na-mumkin lagta hai
wo hamari chhaton ki nigahbani
haDDiyon mein chhed karti
yaKH-basta hawaon se
laD kar karta hai
koi nahin jaanta
us ka apna gharana
mahine ki aaKHiri tariKHen
kis aziyyat se kaTta hai
aur phir
agle mahine ke pahle hafte
wo apni KHidmat
bezar chehron se
bhik ki surat mangta hai
Bushra Saeed 
(1193) Peoples Rate This