Sachchaiyon Ko Bar-sar-e-paikar ChhoD Kar
sachchaiyon ko bar-sar-e-paikar chhoD kar
hum aa gae hain dasht mein ghar-bar chhoD kar
aankhon mein jagte hue KHwabon ka kya karen
ninden chali gain hamein bedar chhoD kar
hum be-KHudi mein kaun si manzil pe aa gae
Thahra hua hai waqt bhi raftar chhoD kar
sahil kise batae yahan apne dil ka dard
maujen chali gain use har bar chhoD kar
lazim nahin ki aql ki har baat Thik ho
ab man lo jo dil kahe takrar chhoD kar
is ke siwa ab aur to pahchan kuchh nahin
jaun kahan main apna ye kirdar chhoD kar
shayad isi malal mein wo dhup Dhal gai
saya chala gaya kahin diwar chhoD kar
ab wadi-e-KHayal mein tanha khaDa hun main
jaane kahan gae mujhe ashaar chhoD kar
Bharat Bhushan Pant 
(956) Peoples Rate This