Teshe Se Koi Kaam Na Farhad Se Hua
teshe se koi kaam na farhad se hua
jo kuchh hua wo ishq ki imdad se hua
meri taraf jo zulf se phenka nikal kar
aisa qusur kya dil-e-nashad se hua
apne KHiram-e-naz ki un ko KHabar nahin
kahte hain hashr teri hi fariyaad se hua
be-hukm yun kisi ko satata nahin falak
mujh par ye zulm aap ke irshad se hua
'beKHud' ki tarah kaun tumhein jaan de saka
ye kaam ishq mein usi nashad se hua
Bekhud Dehlvi 
(1127) Peoples Rate This