رونق فروغ درد سے کچھ انجمن میں ہے
رونق فروغ درد سے کچھ انجمن میں ہے
خون جگر غریب کا ہر بانکپن میں ہے
دیوانہ زندگانی کا دیتا ہے یوں ثبوت
باہر لحد سے ہے کبھی خونیں کفن میں ہے
دل کے لہو سے روح کی ہوتی ہے پرورش
معراج آگہی کی وفور محن میں ہے
ہر بوند نوک کلک کی دیتی ہے درس ہوش
کونین کا سراغ بھی بطن سخن میں ہے
دو یک نفس ہے خیمۂ گل کا فریب رنگ
عبرت فروش خار بھی صحن چمن میں ہے
آفاق ساز مذہب ایثار پھر سے ڈھونڈ
اک لعل شب چراغ بھی طاق کہن میں ہے
یارو سخن برائے سخن مطلقاً عبث
پیغام ہست و بود کہیں فکر و فن میں ہے
اخلاص دل کا رحمت باری سے کر طلب
روشن چراغ عدل کہاں انجمن میں ہے
بوزر کا فقر حضرت فاروقؓ کا مزاج
اصنام ساز قوم کے شیخ زمن میں ہے
سوداگری سے مانا کہ حاصل ہے کچھ وقار
سامان مفسدات بھی تزئین تن میں ہے
عصر رواں کے لوگ ہیں آوارگی پسند
فتنہ بھی حرص و آز کا خضر زمن میں ہے
شبنم سے پنکھڑی بھی سلگتی ہے پھول کی
نیرنگئ خزاں بھی بہار چمن میں ہے
فیضان ارتقا سے جنازہ خلوص کا
خیرالامم کے دوش پہ شہر زمن میں ہے
جمہوریت بھی طرفہ تماشہ کا کس قدر
لوح و قلم کی جان ید اہرمن میں ہے
اس افترا پہ دیجئے کچھ مفتری کو داد
جنت اگر کہیں ہے تو میرے وطن میں ہے
جانے کسے نصیب ہو ببیاکؔ آگہی
ناقد جدید دور کا تخمین و ظن میں ہے
بیباک بھوجپوری 
(996) ووٹ وصول ہوئے
Raunaq Farogh-e-dard Se Kuchh Anjuman Mein Hai In Urdu By Famous Poet Bebak Bhojpuri. Raunaq Farogh-e-dard Se Kuchh Anjuman Mein Hai is written by Bebak Bhojpuri. Enjoy reading Raunaq Farogh-e-dard Se Kuchh Anjuman Mein Hai Poem on Inspiration for Students, Youth, Girls and Boys by Bebak Bhojpuri. Free Dowlonad Raunaq Farogh-e-dard Se Kuchh Anjuman Mein Hai by Bebak Bhojpuri in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends