Wo Rind Kya Ki Jo Pite Hain Be-KHudi Ke Liye
wo rind kya ki jo pite hain be-KHudi ke liye
surur chahiye wo bhi kabhi kabhi ke liye
ye kya ki bazm mein shamen jala ke baiThe ho
kabhi milo to sar-e-rah dushmani ke liye
awadh ki sham rafiqon ko mah-jabinon ko
har ek chhoD ke aae the bambai ke liye
magar ye kya ki ba-juz-dard kuchh hamein na mila
ajib shahr hai ye ek ajnabi ke liye
hazar chahen na chuTegi hum se ye duniya
yahin rahenge mohabbat ki be-kasi ke liye
koi panah nahin koi ja-e-amn nahin
hayat johd-e-musalsal hai aadmi ke liye
ye kah raha hai koi apne jaan-nisaron se
kuchh aur chahiye ab rasm-e-ashiqi ke liye
kahan kahan na pukara kahan kahan na gae
bas ek tabassum-e-pinhan ki raushni ke liye
Baqar Mehdi 
(886) Peoples Rate This