Apna BigDa Hua Banaw Liye
apna bigDa hua banaw liye
ji rahe hain wahi subhaw liye
sham utri hai phir ahate mein
jism par raushni ke ghaw liye
sidhi sadi si rah thi mujh tak
tum ne nahaq kai ghumaw liye
dard ke qahr se laDen kab tak
ek tere rup ka alaw liye
log dariya samajh rahe hain mujhe
mujh mein sahra hai ek bahaw liye
dil ne be-rang hone se pahle
halke gahre kai rachaw liye
tujh se kahna tha kuchh pa lagta hai
mar hi jaenge ji mein chaw liye
Bakul Dev 
(726) Peoples Rate This