Ab UjaDne Ke Hum Na Basne Ke
ab ujaDne ke hum na basne ke
kaT gae jal sare phansne ke
tajrabon mein na zahr zaea kar
sikh aadab pahle Dasne ke
us se kahiyo jo KHud mein Duba hai
tujh pe baadal nahin barasne ke
milna-julna abhi bhi hai lekin
hath se hath ab na masne ke
naqsh-e-sani hain jhilmilate sarab
naqsh-e-awwal the paon dhansne ke
aisa viran hua hai dil is bar
ab ke imkan nahin hain basne ke
ruThe bachchon se chheD karta hun
DhunDhta hun bahane hansne ke
Bakul Dev 
(930) Peoples Rate This