Aag Hi Kash Lag Gai Hoti
aag hi kash lag gai hoti
do ghaDi ko to raushni hoti
log milte na jo naqabon mein
koi surat na ajnabi hoti
puchhte jis se apna nam aisi
shahr mein ek to gali hoti
baat koi kahan KHushi ki thi
dil ko kis baat ki KHushi hoti
maut jab tere iKHtiyar mein hai
mere qabu mein zindagi hoti
mahak uThta nagar nagar 'KHawar'
dil ki KHushbu agar uDi hoti
Badiuzzama Khawar 
(766) Peoples Rate This