Dahr Mein Ek Tere Siwa Kya Hai
dahr mein ek tere siwa kya hai
tu nahin hai to phir bhala kya hai
sila-e-zauq mai-kashi malum
zarf kya shai hai hausla kya hai
hashiye apne matn hai un ka
mohtasib phir saza jaza kya hai
puchhta hun har ek sae se
chandni ka ata-pata kya hai
un ko hai dawa-e-asihai
jo nahin jaante shifa kya hai
kis liye gardish-e-mudam mein hain
aasmanon ko ye hua kya hai
le uDegi buland-parwazi
dosto saya-e-huma kya hai
itni ifraat aisi mahrumi
dene wale moamla kya hai
sail-e-sham-o-sahar mein bahte hain
kya KHabar zist kya qaza kya hai
hum hi chup ho gae 'tamannai'
de raha hai koi sada kya hai
Aziz Tamannai 
(938) Peoples Rate This