Hum Usko Bhul BaiThe Hain Andhere Hum Pe Tari Hain
hum us ko bhul baiThe hain andhere hum pe tari hain
magar us ke karam ke silsile duniya pe jari hain
karen ye sair karon mein ki uD len ye jahazon mein
farishta maut ka kahta hai ye meri sawari hain
na un ke qaul hi sachche na un ke tol hi sachche
ye kaise desh ke tajir hain kaise byopari hain
hamari muflisi aawargi pe tum ko hairat kyun
hamare pas jo kuchh hai wo saughaten tumhaari hain
nasab ke KHun ke rishte hon ya pine pilane ke
kalai par bandhe dhage ke rishte sab pe bhaari hain
ye apni bebasi hai ya ki apni be-hisi yaro
hai apna hath un ke samne jo KHud bhikari hain
hamein bhi dekh le duniya ki raunaq dekhne wale
teri aankhon mein jo aankhen hain wo aankhen hamari hain
aziz-e-na-tawan ke samne kohsar-e-gham halka
magar ehsan ke tinke azal se un pe bhaari hain
Aziz Ansari 
(777) Peoples Rate This