Silsila Yun Bhi Rawa Rakkha Shanasai Ka
silsila yun bhi rawa rakkha shanasai ka
koi rishta to rahe aankh se binai ka
tabsira KHub yahan tir ki raftar pe hai
tazkira kaun kare zaKHm ki gahrai ka
mohtaram kah ke mujhe us ne pasheman kiya
koi pahlu na mila jab meri ruswai ka
tang aa kar teri yaadon ko pare jhaTka hai
marsiya kaun paDhe roz ki tanhai ka
apne zaKHmon se gila hai mujhe itna 'azhar'
main ne ehsan uTha rakkha hai purwai ka
Azhar Nawaz 
(990) Peoples Rate This