PeD Aangan Ke Tere Jab Barwar Ho Jaenge
peD aangan ke tere jab barwar ho jaenge
doston ke hath ke patthar idhar ho jaenge
mere ashkon ke ye qatre lakh be-qimat sahi
jab tere daman pe Tapkenge guhar ho jaenge
kya KHabar thi hum idhar ghar mein jalaenge charagh
us taraf jhonke hawa ke ba-KHabar ho jaenge
is jahan-e-be-aman mein barg-e-awara hain hum
jab chalegi tez aandhi dar-ba-dar ho jaenge
zulmaton se haar manenge na ai 'azad' hum
KHud farozan ho ke sham-e-rahguzar ho jaenge
Azad Gurdaspuri 
(667) Peoples Rate This