Phir Sada-e-mohabbat Suni Hai Abhi
phir sada-e-mohabbat suni hai abhi
zaKHm-e-nau ki saadat mili hai abhi
rabta dil ka dil se hai kafi mujhe
nur hi nur mein zindagi hai abhi
waqt badla hai hum tum to badle nahin
wo hi chahat wahi bebasi hai abhi
ye jabin aur kisi dar pe jhukti hi kyun
us mein teri mohabbat juDi hai abhi
kuchh tamanna se baDh kar bhi paya magar
aarzu ek sab se baDi hai abhi
aaj bhi zindagani mein jaan-e-'safi'
aur sab kuchh hai teri kami hai abhi
Ateequrrahman Safi 
(650) Peoples Rate This