FaKHta ShaKH Se UDte Hue Ghabrai Thi
faKHta shaKH se uDte hue ghabrai thi
jab parindon ke bilakne ki sada aai thi
aable meri zaban par hain to hairat kaisi
main ne ek bar teri jhuTi qasam khai thi
kab ye socha tha barabar se guzar jaega
meri jis shaKHs se barson ki shanasai thi
ab wo kahta hai ki zanjir bani mere liye
us ke pairon mein jo pael kabhi pahnai thi
waqt badle to har ek rishta badalta hai 'hasan'
dil mein diwar kahan pahle mere bhai thi
Ataul Hasan 
(974) Peoples Rate This