تعارف
خوب پہچان لو اسرار ہوں میں
جنس الفت کا طلب گار ہوں میں
عشق ہی عشق ہے دنیا میری
فتنۂ عقل سے بے زار ہوں میں
خواب عشرت میں ہیں ارباب خرد
اور اک شاعر بیدار ہوں میں
چھیڑتی ہے جسے مضراب الم
ساز فطرت کا وہی تار ہوں میں
رنگ نظارۂ قدرت مجھ سے
جان رنگینئ کہسار ہوں میں
نشۂ نرگس خوباں مجھ سے
غازۂ عارض و رخسار ہوں میں
عیب جو حافظ و خیام میں تھا
ہاں کچھ اس کا بھی گنہ گار ہوں میں
زندگی کیا ہے گناہ آدم
زندگی ہے تو گنہ گار ہوں میں
رشک صد ہوش ہے مستی میری
ایسی مستی ہے کہ ہشیار ہوں میں
لے کے نکلا ہوں گہر ہائے سخن
ماہ و انجم کا خریدار ہوں میں
دیر و کعبہ میں مرے ہی چرچے
اور رسوا سر بازار ہوں میں
کفر و الحاد سے نفرت ہے مجھے
اور مذہب سے بھی بے زار ہوں میں
اہل دنیا کے لیے ننگ سہی
رونق انجمن یار ہوں میں
عین اس بے سر و سامانی میں
کیا یہ کم ہے کہ گہر بار ہوں میں
میری باتوں میں مسیحائی ہے
لوگ کہتے ہیں کہ بیمار ہوں میں
مجھ سے برہم ہے مزاج پیری
مجرم شوخئ گفتار ہوں میں
حور و غلماں کا یہاں ذکر نہیں
نوع انساں کا پرستار ہوں میں
محفل دہر پہ طاری ہے جمود
اور وارفتۂ رفتار ہوں میں
اک لپکتا ہوا شعلہ ہوں میں
ایک چلتی ہوئی تلوار ہوں میں
اسرار الحق مجاز 
(1330) ووٹ وصول ہوئے
Taaruf In Urdu By Famous Poet Asrar-ul-Haq Majaz. Taaruf is written by Asrar-ul-Haq Majaz. Enjoy reading Taaruf Poem on Inspiration for Students, Youth, Girls and Boys by Asrar-ul-Haq Majaz. Free Dowlonad Taaruf by Asrar-ul-Haq Majaz in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends