Mujhe To Ye Bhi Fareb-e-hawas Lagta Hai
mujhe to ye bhi fareb-e-hawas lagta hai
wagarna kaun andheron mein sath chalta hai
bikhar chuki jaras-e-karwan-e-gul ki sada
ab us ke baad to wamandgi ka waqfa hai
jo dekhiye to sabhi karwan mein shamil hain
jo sochiye to safar mein har ek tanha hai
kise KHabar ki ye duri ka bhed kiya shai hai
qadam uThao to rasta bhi sath chalta hai
ubhar rahe hain jo manzar fareb-e-manzar hain
jo khul raha hai daricha to wahm apna hai
talab to kar kise malum kaamgar bhi ho
zamana aib-o-hunar ab kahan parakhta hai
teri sada hai ki zulmat mein raushni ki lakir
tera badan hai ki naghmon ka dil dhaDakta hai
udasiyon ko na chhune de phul sa paikar
abhi kuchh aur tujhe ahl-e-gham pe hansna hai
meri wafa pe bhi ai dost e'tibar na kar
mujhe bhi teri tarah sab se pyar karna hai
ye puchhna hai ki ghairon se kiya mila tujh ko
teri jafa ki shikayat to kaun karta hai
chaman chaman hai agar gul-fishan to kya kije
hamein to apne KHarabe ko hi palaTna hai
ye ek chap jo barson mein sun raha hun main
koi to hai jo yahan aa ke luT jata hai
Aslam Ansari 
(1067) Peoples Rate This