Ain-mumkin Hai Kisi Tarz-e-ada Mein Aae
ain-mumkin hai kisi tarz-e-ada mein aae
qissa-e-dard-e-wafa saut-o-sada mein aae
rut badalte hi nae rang ke manzar ubhre
kuchh parinde bhi nai mauj-e-hawa mein aae
hum to aaina-numa the hi safa-keshi mein
nam kuchh aur bhi arbab-e-safa mein aae
ishq ta-haal to matruk nahin ho paya
inqilabaat bhi go rah-e-wafa mein aae
kuchh gul-e-nilofari jhil ki tariki se
apni danist mein aqlim-e-baqa mein aae
kya kahen us ko tazadat-e-zamana ke siwa
kitne darwesh the jo shahi qaba mein aae
KHwab aankhon mein liye hum bhi ba-taid-e-junun
kaise ek jalwa-gah-e-KHwab-numa mein aae
shorish-e-ahd mein ye tazkira-e-ishq-e-wafa
jaise naghma sa koi bang-e-dara mein aae
KHud ko gum kar ke kisi aur ke pa lene tak
marhale aur bhi takmil-e-ana mein aae
Aslam Ansari 
(1194) Peoples Rate This