Jaane Kyun
jab main tum se milta hun
baad ek muddat ke
tum ko apna kahne mein
tum se baat karne mein
jaane kyun jhijhakta hun
aur sochta hun main
waqt ke taqazon se
tum badal bhi sakti ho
har dafa magar tum mein
wo hi apna-pan paya
wo hi sadgi pai
be-takallufi pai
ye yaqin ho aaya
tum badal nahin saktin
phir bhi aisa hota hai
jab main tum se milta hun
baad ek muddat ke
tum ko apna kahne mein
tum se baat karne mein
jaane kyun jhijhakta hun
Ashok Lal 
(808) Peoples Rate This