Jab Zara Raat Hui Aur Mah O Anjum Aae
jab zara raat hui aur mah o anjum aae
bar-ha dil ne ye mahsus kiya tum aae
aise iqrar mein inkar ke sau pahlu hain
wo to kahiye ki labon pe na tabassum aae
na wo aawaz mein ras hai na wo lahje mein khanak
kaise kaliyon ko tera tarz-e-takallum aae
bar-ha ye bhi hua anjuman-e-naz se hum
surat-e-mauj uThe misl-e-talatum aae
ai mere wada-shikan ek na aane se tere
dil ko bahkane kai talKH tawahhum aae
Asad Bhopali 
(838) Peoples Rate This