یار کے نرگس بیمار کا بیمار رہا
یار کے نرگس بیمار کا بیمار رہا
یہی آزار مرے درپئے آزار رہا
عمر بھر شیفتۂ چشم و لب یار رہا
کبھی صورت رہی مجھ کو کبھی بیمار رہا
دل کو میرے نہ ذرا رنج شب تار رہا
شمع افروز خیال رخ و کدار رہا
لب پہ دل سوختوں کے نالہ شرر بار رہا
سرد مہری کا ترے گرم یہ بازار رہا
میں فدا رخ پہ وہ زلفوں کا گرفتار رہا
دل کو تجھ سے نہ مجھے دل سے سروکار رہا
خود فروشی سر بازار جو لائی ان کو
مصر میں ایک نہ یوسف کا خریدار رہا
میرے مرنے سے پھنسا دام غم و رنج میں وہ
میں رہا ہو گیا صیاد گرفتار رہا
بت پرستی میں بھی بھولی نہ مجھے یاد خدا
ہاتھ میں سبحہ گلے میں مرے زنار رہا
لاکھ اسیروں کو کیا تم نے رہا زنداں سے
ایک محروم عنایت یہ گنہ گار رہا
تیری اے وحشت دل دست درازی نہ گئی
بعد مردن بھی کفن میں نہ کوئی تار رہا
روزن قبر سے جھانکے جو وہ عیسیٰ آیا
مر گئے پر بھی ہمیں دید کا آزار رہا
چوم لیں نشہ میں آج ان کی نشیلی آنکھیں
عین بے ہوشی لذت میں بھی ہشیار رہا
رخ سے اپنے جو نقاب اس نے اٹھایا تو کیا
پردۂ شرم و حیا مانع دیدار رہا
دشت وحشت میں رہے قیس سے لاکھوں ہم راہ
سارے دیوانوں کا میں قافلہ سالار رہا
بے خطا کون دل آزار خفا تھا تم سے
عمر بھر تو جو قلقؔ زیست سے بیزار رہا
ارشد علی خان قلق 
(930) ووٹ وصول ہوئے
Yar Ke Nargis-e-bimar Ka Bimar Raha In Urdu By Famous Poet Arshad Ali Khan Qalaq. Yar Ke Nargis-e-bimar Ka Bimar Raha is written by Arshad Ali Khan Qalaq. Enjoy reading Yar Ke Nargis-e-bimar Ka Bimar Raha Poem on Inspiration for Students, Youth, Girls and Boys by Arshad Ali Khan Qalaq. Free Dowlonad Yar Ke Nargis-e-bimar Ka Bimar Raha by Arshad Ali Khan Qalaq in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends