AaKHir Humne Taur Purana ChhoD Diya
aaKHir hum ne taur purana chhoD diya
us ki gali mein aana-jaana chhoD diya
manzar bhi sab banjh ruton mein Dub gae
aankhon par bhi pahra biThana chhoD diya
KHatm hui shorida-sari lab sil se gae
mahfil mahfil hansna-hansana chhoD diya
nazron par khiDki ke paT diwar kiye
darwazon mein us ka sajaana chhoD diya
jab se hua ehsas diya hone ka hamein
tez hawa ke samne jaana chhoD diya
Dar tha kahin kuchh apne liye bhi mang na len
hum ne dua ko hath uThana chhoD diya
'arsh' hua ek lafz jo minha yaadon se
hum ne ghar ko qufl lagana chhoD diya
Arsh Siddiqui 
(1898) Peoples Rate This