دیوالی
دیوالی
رگھبر کی پاک یاد کا عنواں لیے ہوئے
ظلمت کے گھر میں جلوۂ تاباں لیے ہوئے
تاریکیوں میں نور کا ساماں لیے ہوئے
آئی ہے اپنے ساتھ چراغاں لیے ہوئے
اللہ رے یہ تاب یہ تنویر یہ جمال
خورشید کی نظر بھی ہے جمنی یہاں محال
طاری ہے زاہدوں پہ بھی عالم سرور کا
اب کس لیے خیال ہو حور و قصور کا
عالم تو دیکھیے شب یلدا پہ نور کا
جلتے ہیں یہ چراغ کہ جلوہ ہے طور کا
منظر بہشت کا ہے یہ شب ہے شب برات
تنویر آفتاب کا پرتو ہے آج رات
وہ رام جو کہ کامل صدق و صفا رہا
وہ رام جو کہ سالک راہ ہدیٰ رہا
وہ رام جو کہ آئینۂ حق نما رہا
وہ رام جو کہ قاطع جور و جفا رہا
یہ رات یادگار ہے اس نیک ذات کی
اس پیکر خلوص کی والا صفات کی
چودہ برس کے بعد جو آیا وطن میں رام
ہر لب تھا وقف نغمہ تو ہر دل تھا شاد کام
تھی رشک نور صبح بنارس اودھ کی شام
اہل اجودھیا کی زباں پر تھا یہ کلام
ہم بے بسوں کا قافلہ سالار آ گیا
بن باسیوں کی فوج کا سردار آ گیا
عرش ملسیانی 
(928) ووٹ وصول ہوئے
Diwali In Urdu By Famous Poet Arsh Malsiyani. Diwali is written by Arsh Malsiyani. Enjoy reading Diwali Poem on Inspiration for Students, Youth, Girls and Boys by Arsh Malsiyani. Free Dowlonad Diwali by Arsh Malsiyani in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends