Kitne Sawal Sab Ki Nigahon Mein Rakh Diye
kitne sawal sab ki nigahon mein rakh diye
ghar ke sabhi charagh hawaon mein rakh diye
ye inqalab-e-gardish-e-dauran to dekhiye
ajsam kaise kaisi qabaon mein rakh diye
mahfil mein sher hi nahin kuchh raushni ba-dosh
anwar hum ne dil ki fazaon mein rakh diye
har shaKHs chahta hai ki hon us pe aashkar
asrar tu ne kaise gunahon mein rakh diye
fitrat ka ye sitam bhi hai 'danish' ajib chiz
sar kaise kaise kaisi kulahon mein rakh diye
Aqeel Danish 
(879) Peoples Rate This