Jo Sunta Hun Kahunga Main Jo Kahta Hun Sununga Main
jo sunta hun kahunga main jo kahta hun sununga main
hamesha majlis-e-nutq-o-samaat mein rahunga main
nahin hai talKH-goi shewa-e-sanjidgan lekin
mujhe wo galiyan denge to kya chup sadh lunga main
kam-az-kam ghar to apna hai agar viran bhi hoga
to dahliz o dar-o-diwar se baaten karunga main
yahi ehsas kafi hai ki kya tha aur ab kya hun
mujhe bilkul nahin tashwish aage kya banunga main
meri aankhon ka sona chahe miTTi mein bikhar jae
andheri raat teri mang mein afshan bharunga main
husul-e-agahi ke waqt kash itni KHabar hoti
ki ye wo aag hai jis aag mein zinda jalunga main
koi ek aadh to hoga mujhe jo ras aa jae
bisat-e-waqt par hain jis qadar mohre chalunga main
agar is martaba bhi aarzu puri nahin hogi
to is ke baad aaKHir kis bharose par jiyunga main
yahi hoga kisi din Dub jaunga samundar mein
tamannaon ki KHali sipiyan kab tak chununga main
Anwar Shuoor 
(884) Peoples Rate This