Main Nazar Se Pi Raha Hun Ye Saman Badal Na Jae
main nazar se pi raha hun ye saman badal na jae
na jhukao tum nigahen kahin raat Dhal na jae
mere ashk bhi hain is mein ye sharab ubal na jae
mera jam chhune wale tera hath jal na jae
abhi raat kuchh hai baqi na uTha naqab saqi
tera rind girte girte kahin phir sambhal na jae
meri zindagi ke malik mere dil pe hath rakhna
tere aane ki KHushi mein mera dam nikal na jae
mujhe phunkne se pahle mera dil nikal lena
ye kisi ki hai amanat mere sath jal na jae
Anwar Mirzapuri 
(2145) Peoples Rate This