Chale Hi Jaegi Kya Dard Ki KaTari Bhala
chale hi jaegi kya dard ki kaTari bhala
rahegi sath kahan tak ye aah-o-zari bhala
jahan KHulus ki azmat samajh sake na koi
is anjuman mein ho kya qadr-e-jaan-nisari bhala
sahi na jaegi ab hum se ye firaq ki aag
akele sulgen kahan tak tere pujari bhala
nafas nafas mein jo tahlil ho chuka wo gham
chhupae kaise tabassum ki parda-dari bhala
baDha jo zabt hadon se to KHud khulenge honT
rahega bazm pe kab tak sukut tari bhala
chalo yahan se bhi 'anjum' ko baiThne degi
kahan sukun se ye dil ki be-qarari bhala
Anwar Anjum 
(1712) Peoples Rate This