Gham Sahen Ya KHushi Ko Pyar Karen
gham sahen ya KHushi ko pyar karen
kaun si chiz iKHtiyar karen
hum ba-qaid-e-qafas chaman se dur
kaise andaza-e-bahaar karen
fasl-e-gul aa gai hai ahl-e-junun
phir gareban ko tar tar karen
kali kali ghaTa mein chhai hain
aaiye zikr-e-zulf-e-yar karen
dil diya hai to un ke qadmon par
zindagani ko bhi nisar karen
jis mein shamil hon sab rais-o-gharib
aisi mahfil ko ba-waqar karen
anjuman tab kahen jab 'anjum' ko
aap apna sharik-e-kar karen
Anjum Siddiqui 
(718) Peoples Rate This