Kash
tumhaare chehre par
sirf do aankhen meri aashna hain
jo mujh se ham-kalam rahti hain
main tumhein apni tamam hissiyat ki yaksui se mila hun
tumhaara jism meri poron ke liye ajnabi sahi
lekin phir bhi
tumhaari KHushbu mein lipTa hua tumhaara lams
mujhe basi nahin hone deta
kanakhiyon se dekhte hue sochta hun
tumhein ji bhar kar dekhne se bhi
aankhen bhuki rah jati hain!
ai mere be-baha!
kash main har samt se
hazar aankhon se tumhein dekhta
lakhon masamon se tumhaare lams chunta
aur tumhaare donon honTon ko
apne pure badan se chum sakta!
Anjum Saleemi 
(1349) Peoples Rate This