Sab Ko Apne Zehan Se JhaTka KHud Ko Yaad Kiya
sab ko apne zehan se jhaTka KHud ko yaad kiya
lekin aisa sab kuchh luT jaane ke baad kiya
us ko us ki apni qurbat ne sarshaar rakkha
mujhe to shayad mere hijr ne hi barbaad kiya
main bhi KHali ho kar apne ghar lauT aaya hun
us ne bhi ek virane ko ja aabaad kiya
kis shafqat mein gundhe hue maula man bap diye
kaisi pyari ruhon ko meri aulad kiya
ishq mein 'anjum' le Dubi hai thoDi si taKHir
janmon pahle jo wajib tha wo ma-baad kiya
Anjum Saleemi 
(937) Peoples Rate This