Mere Junun Ko Hawas Mein Shumar Kar Lega
mere junun ko hawas mein shumar kar lega
wo mere tir se mujh ko shikar kar lega
mujhe guman bhi nahin tha ki Dubta hua dil
muhit jism ko ek rose par kar lega
main us ki rah chalun bhi to faeda kya hai
wo koi aur rawish iKHtiyar kar lega
fasil-e-shahr mein rukne ki hi nahin ye KHabar
jo kaam hum se na hoga ghubar kar lega
wo gul-badan kabhi nikla jo sair-e-sahra ko
to apne sath hawa-e-bahaar kar lega
jahan pe baat faqat naqd-e-jaan se banti ho
wo KHush-kalam wahan bhi udhaar kar lega
hum aise log bahut KHush-guman hote hain
ye dil zarur tera e'tibar kar lega
khulega is pe hi 'anjum'-KHaliq bab-e-qubul
jo apna haqq-e-talab ustuwar kar lega
Anjum Khaleeq 
(858) Peoples Rate This