Itni Sari Shamon Mein Ek Sham Kar Lena
itni sari shamon mein ek sham kar lena
sog chand lamhon ka mere nam kar lena
lauT kar yaqinan main ek roz aaunga
palkon pe charaghon ka ehtimam kar lena
ek janm ka main pyasa rasta bhi hai lamba
ek qulzum-e-mai ka intizam kar lena
hum fana-nasibon ko aur kuchh nahin aata
KHun sharab kar lena jism jam kar lena
ye parind parwarda hai khuli fazaon ka
sabz bagh dikhla kar zer-e-dam kar lena
KHak se hamari bhi ho kabhi guzar tera
bar-zaban-e-sham-o-gul kuchh kalam kar lena
be-takallufana aa sada-lauh logon mein
rang-ashnaon mein jashn-e-baam kar lena
waqt-e-sham palkon par jhilmila uThen tare
shamil-e-dua 'anjum' ka bhi nam kar lena
Anjum Irfani 
(893) Peoples Rate This