Dhup Chhanw Zehnon Ka Aasra Nahin Rakhte
dhup chhanw zehnon ka aasra nahin rakhte
hum gharaz ke bandon se wasta nahin rakhte
zoam-e-parsai mein kab KHayal hai un ko
tanz to wo karte hain aaina nahin rakhte
sazishen alamat to past himmati ki hain
sazishen jo karte hain hausla nahin rakhte
wo ghurur-e-taqwa mein bas yahi samajhte hain
jaise hai KHuda un ka hum KHuda nahin rakhte
tum hawas-paraston ke sainkaDon KHuda Thahre
ek hai KHuda apna dusra nahin rakhte
kis tarah munawwar ho KHana-e-shuur 'anjum'
zehn ke darichon ko tum khula nahin rakhte
Anjum Azimabadi 
(686) Peoples Rate This