Naqab UlTa Hai Shamon Ne Sitaro Tum To So Jao
naqab ulTa hai shamon ne sitaro tum to so jao
karenge raqs parwane sitaro tum to so jao
nigahon mein nigah Dale nashe mein chur matwale
paDhenge dil ke afsane sitaro tum to so jao
sajegi mahfil-e-yaran badan simabi jumenge
karenge raqs paimane sitaro tum to so jao
bhaTakte hain gulistan mein bayabanon mein sahra mein
misal-e-qais diwane sitaro tum to so jao
wo baiThe hain jhukae sar ada-e-dil-nawazi se
lage hain KHud se sharmane sitaro tum to so jao
khuli zulfen liye wo jhil ki jaanib KHiraman se
barhana-pa lage aane sitaro tum to so jao
dabae honT danton mein lage hain chashm-o-mizhgan se
nazar ke tir barsane sitaro tum to so jao
utar kar aasman se dekhiye ruThe sanam ko ab
qamar aaya hai bahlane sitaro tum to so jao
hue hain TukDe TukDe ab dil-e-bismil ke ai 'kaifi'
ki hoga kya KHuda jaane sitaro tum to so jao
Anees Kaifi 
(899) Peoples Rate This