روشنی کم ہے
روشنی کم ہے نہ کر اس کی شکایت ہمدم
روشنی کم ہی رہے تو اچھا
شادمانی و خوشی کے ہم راہ
اک نہ اک غم بھی رہے تو اچھا
دشت و صحرا ہو کہ باغ دبستاں
سطح دریا ہو کہ چٹیل میدان
رات ہر چیز پہ ہے سایہ نشاں
روشنی کم ہے اندھیرا ہی زیادہ ہے یہاں
شاہراہوں کے نظاروں پہ نہ جا
قمقموں کی نظر افروز قطاروں پہ نہ جا
کیونکہ اک چشم بصیرت کے لیے
جو بھی ہے پیش نظر
چشمک برق ہے یا رقص شرر
آ ذرا موڑ ادھر کو بھی نگاہیں اپنی
تیرہ و تار ہے کتنی یہ گلی
ٹمٹماتی ہے جہاں کھمبے پر
ایک میلی سی شکستہ چمنی
جس طرح نزع میں کوئی بیمار
کب تلک روشنی پھیلائے گی یہ
صبح سے پہلے ہی بجھ جائے گی یہ
اور پھر ایک گھٹا ٹوپ اندھیرا ہوگا
اس اندھیرے ہی میں بس اس کا سویرا ہوگا
آ کہ ہم اب دل انساں بھی ٹٹولیں چل کر
بند ہیں یہ جو دریچے انہیں کھولیں چل کر
ایک یا دو کے سوا سب ہیں سیاہی سے بھرے
جیسے پتے شجر خشک میں دو چار ہرے
تیرہ و تار ہے کس درجہ ضمیر انساں
روشنی اس میں کہاں
روشنی کم ہے اندھیرا ہی زیادہ ہے یہاں
امجد نجمی 
(897) ووٹ وصول ہوئے
Raushni Kam Hai In Urdu By Famous Poet Amjad Najmi. Raushni Kam Hai is written by Amjad Najmi. Enjoy reading Raushni Kam Hai Poem on Inspiration for Students, Youth, Girls and Boys by Amjad Najmi. Free Dowlonad Raushni Kam Hai by Amjad Najmi in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends