Suraj
suraj ke dam se bachcho duniya mein hai ujala
suraj na ho to chehra duniya ka hoga kala
suraj mein madde ki haalat plasma hai
puchho ye aaj hum se kaisi hai aur kya hai
han gas se ziyaada halki plasma hai
bachcho ye tez garmi ki KHud hi rahnuma hai
suraj ki raushni se banta hai bhap pani
leti hai janm bachcho baadal ki phir kahani
ek surKH shoala ban kar suraj dahak raha hai
suraj ki raushni se chanda chamak raha hai
solar heateron ko suraj ne di hararat
suraj ki peD paudon pe hoti hai inayat
'hafiz' ye sham ko jo chehra hai KHud hi faq hai
suraj ke Dubne se aakash par shafaq hai
Amjad Husain Hafiz 
(1229) Peoples Rate This