سنو یار اس کی گھٹن کچھ نہیں ہے

سنو یار اس کی گھٹن کچھ نہیں ہے

کسی درد کی اب چبھن کچھ نہیں ہے

کھلونے ہیں مٹی کے ہم سب یہاں پر

حقیقت یہی ہے بدن کچھ نہیں ہے

یہ مانا کہ پیکر بہت کچھ ہے لیکن

بنا روح یہ پیرہن کچھ نہیں ہے

لگی آگ خوابوں میں اتنی کہ سمجھو

یہ آنکھوں کی میرے جلن کچھ نہیں ہے

میں خود مستقل ہوں سفر میں سو مجھ کو

یہ لگنے لگا ہے تھکن کچھ نہیں ہے

بنا ساتھ تیرے سبھی کچھ ہے سونا

یہ دنیا جہاں انجمن کچھ نہیں ہے

نمائش ہے سب میتؔ میرے غموں کی

غزل کچھ نہیں ہے یہ فن کچھ نہیں ہے