Bhule Se Bhi Na Jaanib-e-aghyar Dekhna
bhule se bhi na jaanib-e-aghyar dekhna
shart-e-wafa yahi hai KHabardar dekhna
manind-e-shama baiTh ke tai ki rah-e-adam
yaro mojaza hai ki raftar dekhna
kahti hai ruh dil se dam-e-naza hoshiyar
hum to adam ko jate hain ghar-bar dekhna
allah re iztirab-e-tamanna-e-did-e-yar
fursat mein ek nigah ki sau bar dekhna
'taslim' ru-e-yar ko hasrat ki aankh se
achchha nahin hai shauq mein har bar dekhna
Amirullah Tasleem 
(807) Peoples Rate This