Tujhko Apna Ke Bhi Apna Nahin Hone Dena
tujh ko apna ke bhi apna nahin hone dena
zaKHm-e-dil ko kabhi achchha nahin hone dena
main to dushman ko bhi mushkil mein kumak bhejunga
itni jaldi use paspa nahin hone dena
tu ne mera nahin hona hai to phir yaad rahe
main ne tujh ko bhi kisi ka nahin hone dena
tu ne kitnon ko nachaya hai ishaaron pe magar
main ne ai ishq! ye mujra nahin hone dena
us ne khai hai qasam phir se mujhe bhulne ki
main ne is bar bhi aisa nahin hone dena
zindagi mein to tujhe chhoD hi deta lekin
phir ye socha tujhe bewa nahin hone dena
mazhab-e-ishq koi chhoD mare to main ne
aise murtad ka janaza nahin hone dena
Amir Ameer 
(5335) Peoples Rate This