وعدۂ وصل اور وہ کچھ بات ہے
وعدۂ وصل اور وہ کچھ بات ہے
ہو نہ ہو اس میں بھی کوئی گھات ہے
خلق ناحق درپئے اثبات ہے
ہے دہن اس کا کہاں اک بات ہے
بوسۂ چاہ زنخداں غیر لیں
ڈوب مرنے کی یہ اے دل بات ہے
گھر سے نکلے ہو نہتے وقت قتل
یہ بھی بہر قتل عاشق گھات ہے
میں نے اتنا ہی کہا بنواؤ خط
یہ بگڑنے کی بھلا کیا بات ہے
بعد مدت بخت جاگے ہیں مرے
بیٹھے ہیں سونے کو ساری رات ہے
کیا کروں وصف بتان خودپسند
ان سے بڑھ کر بس خدا کی ذات ہے
باتوں باتوں میں جو میں کچھ کہہ گیا
ہنس کے فرمانے لگے کیا بات ہے
حرف مطلب صاف کہہ سکتا نہیں
ہے ادب مانع کہ پہلی رات ہے
مجھ سے ہو اظہار الفت واہ وا
آپ کے فرمانے کی یہ بات ہے
رو رہے ہیں ہم ملا دے لب سے لب
مے کشی ہو ساقیا برسات ہے
زچ ہے تیری چال سے رفتار چرخ
مہر رخ سے بازیٔ مہ مات ہے
کیسی کٹتی ہے سیہ بختی میں عمر
رات سے دن دن سے بد تر رات ہے
چھیڑتا ہے دل کو کیا اے درد ہجر
خود گرفتار ہزار آفات ہے
اے غنی دے سیم و زر وقت بلا
مال دنیا جان کی خیرات ہے
گر جگہ دل میں نہیں پھر اس سے کیا
یہ دوشنبے کی یہ بدھ کی رات ہے
صاف کہہ دے تو یہاں آیا نہ کر
یار یہ سو بات کی اک بات ہے
لخت دل ہیں میرے کھانے کو امیرؔ
بس انہیں ٹکڑوں پہ اب اوقات ہے
امیر مینائی 
(1757) ووٹ وصول ہوئے
Wada-e-wasl Aur Wo Kuchh Baat Hai In Urdu By Famous Poet Ameer Minai. Wada-e-wasl Aur Wo Kuchh Baat Hai is written by Ameer Minai. Enjoy reading Wada-e-wasl Aur Wo Kuchh Baat Hai Poem on Inspiration for Students, Youth, Girls and Boys by Ameer Minai. Free Dowlonad Wada-e-wasl Aur Wo Kuchh Baat Hai by Ameer Minai in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends