Bambai Raat Samundar

samundar bolta hai

samundar apni pur-asrar maujon ki zaban mein bolta hai

samundar ki sadaen chir deti hain shab-e-tarik ki chadar

ubal paDti hain

tasalsul aur tawatur ke dawair mein thirakti hain

suron ke dane ek tasbih ban jate hain lai ke narm hathon mein

jo is aawaz ke jadu ke bas mein hote jate hain

samundar ka kinara saleT hai jis par

umaDti Dubti lahren bikhar kar chhoD jati hain

samundar chhin ke iqlidsi KHake

ajab andaz ki tajridi taswiren

mohan-jodaDo se pahle ke rasm-ul-KHat ki tahriren

paDe hain gate-way-of-india ke farsh par be-ghar bhikari

udhar hain kuchh juari

idhar ek happy laDki apne happy dost ke pahlu mein simTi

chilam ka dam lagati hai

suragh-e-jannat-ul-maut ke talib hain donon ek sadhu se

hashishi nashshe ke dariya mein ghote kha rahe hain

hashishi nashshe hi ki mauj hai goya samundar ki sada bhi

samundar ki siyahi par wo pili raushni ke phul

jahazon ne bikhere hain

andhere mein nazar aata nahin jin ka koi mastul

jahaz aaram karte hain

jahazi shahr ke ishrat-kadon mein ghota-zan honge

hujum-e-hashr-saman ke samundar mein

jahazi chand qatron ki tarah ghul-mil gae honge

yahan to narsi-sas bhi kahin bhi KHud-girafta rah nahin sakta

samundar chheDta hai sahirana simfani jis mein

nawajil dewtaon ke azal-asar shankhon ki

nawajil dewiyon ke mor-pankhon ki

sada aapas mein dhakka marti munh-zor maujon ki

sada sahil ki chaTTanon se Takraati hui pur-shor maujon ki

sada us shahr ki jo nashshe ke aalam mein jari aur sari hai

sada us shahr ki jis ke muqaddar mein hai roz o shab ki bedari

sada us shahr ki jis mein daraKHton aur parindon se ziyaada aadmi honge

sada us shahr ki jis mein ki insanon ke chhatte aasman chhute hue malum hote hain

ubal paDta hai darwazon se galiyon aur saDkon ke muhanon se

ek aadam-zad chyunTi-dal

jahan har-dam bala-raftar karon aur bason ki ham-nawa ban kar

mashinen ahd-e-hazir ka qasida paDhti rahti hain

samundar ke kinare ka mashini shahr sazina hai

jis par aatish o aahan ke naghme raqs karte hain

samundar ke kinare mard o zan ka ek samundar aur bhi hai

samundar ki sada mein us samundar ki sadaen Dub jati hain

be-karani ki sada mein