Kamal-e-tark Nahin Aab-o-gil Se Mahjuri
kamal-e-tark nahin aab-o-gil se mahjuri
kamal-e-tark hai tasKHir-e-KHaki o nuri
main aise faqr se ai ahl-e-halqa baz aaya
tumhaara faqr hai be-daulati o ranjuri
na faqr ke liye mauzun na saltanat ke liye
wo qaum jis ne ganwai mata-e-taimuri
sune na saqi-e-mehwash to aur bhi achchha
ayyar-e-garmi-e-sohbat hai harf-e-mazuri
hakim o aarif o sufi tamam mast-e-zahur
kise KHabar ki tajalli hai ain-e-masturi
wo multafit hon to kunj-e-qafas bhi aazadi
na hon to sehn-e-chaman bhi maqam-e-majburi
bura na man zara aazma ke dekh ise
farang dil ki KHarabi KHirad ki mamuri
Allama Iqbal 
(2325) Peoples Rate This