Hazar KHauf Ho Lekin Zaban Ho Dil Ki Rafiq
hazar KHauf ho lekin zaban ho dil ki rafiq
yahi raha hai azal se qalandaron ka tariq
hujum kyun hai ziyaada sharab-KHane mein
faqat ye baat ki pir-e-mughan hai mard-e-KHaliq
ilaj-e-zof-e-yaqin in se ho nahin sakta
gharib agarche hain 'raazi' ke nukta-ha-e-daqiq
murid-e-sada to ro ro ke ho gaya taib
KHuda kare ki mile shaiKH ko bhi ye taufiq
usi tilism-e-kuhan mein asir hai aadam
baghal mein us ki hain ab tak butan-e-ahd-e-atiq
mere liye to hai iqrar-e-bil-lisan bhi bahut
hazar shukr ki mulla hain sahib-e-tasdiq
agar ho ishq to hai kufr bhi musalmani
na ho to mard-e-musalman bhi kafir o zindiq
Allama Iqbal 
(3222) Peoples Rate This