Lai Hai Kis Maqam Pe Ye Zindagi Mujhe
lai hai kis maqam pe ye zindagi mujhe
mahsus ho rahi hai KHud apni kami mujhe
dekho tum aaj mujh ko bujhate to ho magar
kal DhunDhti phiregi bahut raushni mujhe
tai kar raha hun main bhi ye rahen salib ki
aawaz ai hayat na dena abhi mujhe
sukhe shajar ko phenk dun kaise nikal kar
deta raha hai saya shajar jo kabhi mujhe
kyun kar rahi hai mujh se sawalat zindagi
kah do jawab ki nahin fursat abhi mujhe
kya chahta tha waqt pe likhna na puchhiye
hurmat qalam ki apni bachani paDi mujhe
dil-dariyan bhi rah gain parde mein ai 'ali'
lahja badal badal ke sada di gai mujhe
Ali Ahmad Jalili 
(789) Peoples Rate This