KaTi Hai Gham Ki Raat BaDe Ehtiram Se
kaTi hai gham ki raat baDe ehtiram se
aksar bujha diya hai charaghon ko sham se
raushan hai apni bazm aur is ehtimam se
kuchh dil bhi jal raha hai charaghon ke nam se
muddat hui hai KHun-e-tamanna kiye magar
ab tak Tapak raha hai lahu dil ke jam se
subh-e-bahaar hum ko bulati rahi magar
hum khelte rahe kisi zulfon ki sham se
har sans par hai maut ka pahra laga hua
aahista ai hayat guzar is maqam se
kaTi tamam umr fareb-e-bahaar mein
kanTe sameTte rahe phulon ke nam se
ye aur baat hai ki 'ali' hum na sun sake
aawaz us ne di hai hamein har maqam se
Ali Ahmad Jalili 
(1280) Peoples Rate This